Сеид Атамбаев социалдык тармакта Алмазбек Атамбаев тууралуу тараган маалыматтарга комментарий берди

Жогорку Кеңештин депутаты Сеид Атамбаев социалдык тармактарда Алмазбек Атамбаевге байланыштуу тараган маалыматтар боюнча билдирүү таратты. Ал бул туурасында Фейсбуктагы баракчасына жазып чыкты.

Анын айтымында, атасы учурда ден соолугу менен күрөшүп келе жатат. Социалдык тармакта тарап жаткан маалыматтар туура эмес.

"Урматтуу мекендештер! Акыркы эки күндөн бери атайын чагымчылдыкка түрткөн жана жаштарды саясий кызыкчылыкка колдонуу максатында видео, посттор жарыяланып жатат. Официалдуу түрдө айтат элем, атабыз Атамбаев Алмазбек Шаршенович бүгүнкү күнгө чейин ден соолугу менен алышып жатат, жакынкы арада Кыргызстанга келбейт. Чагымчылдыкка алдырбагыла, туугандар. Мындай маалыматтарды биздин ички же сыртта жүргөн душмандар гана уюштурушу мүмкүн. Биздин мамлекетибизге туруктуулук керек. Баарыңыздарды ынтымакка чакырам", - деп жазган Сеид Атамбаев өз билдирүүсүндө.