Кыргызстан Газа секторундагы ооруканага болгон соккуну кескин айыптады

Кыргызстан Газа секторундагы “Аль-Ахли” ооруканасына болгон соккуну кескин айыптайт. Бул тууралуу Тышкы иштер министрлиги билдирди.

Маалыматта Кыргызстан эл аралык гуманитардык укуктун бузулушун ар тараптуу иликтөөгө чакырганы айтылат.

“Биз жарандарды жана жарандык инфраструктураны коргоону караган эл аралык гуманитардык укуктун принциптерин жана нормаларын сактоонун маанилүүлүгүн баса белгилейбиз. Ушуга байланыштуу биз тараптарды курмандыктарга жана карапайым калкка каршы зордук-зомбулукка жол бербөө жана согуштук аракеттерди токтотуу боюнча комплекстүү чараларды көрүүгө жана тынчтыкка жетишүү таламында сүйлөшүү процессин токтоосуз баштоого чакырабыз”, – деп айтылат билдирүүдө.

Кыргызстан Израил-Палестина жаңжалын Коопсуздук Кеңешинин жана БУУнун Башкы Ассамблеясынын резолюцияларына ылайык тынчтык жолу менен чечүү үчүн дүйнөлүк коомчулуктун күч-аракеттерин бириктирүүнү жактай тургандыгы белгиленди.

Эске салсак, Израилдин Газанын ооруканасына жасаган соккусунан 500дөй адам набыт болгон. Алардын көпчүлүгү аялдар жана балдар экени айтылган.