Адахан Мадумаров 30-октябрга чейин камакта калды (видео)

"Бүтүн Кыргызстан" партиясынын лидери Адахан Мадумаров 30-октябрга чейин камакта калды. Мындай чечимди бүгүн, 18-октябрда Биринчи Май райондук соту чыгарды.

Бүгүнкү соттук отурумда алдын-ала угуу болду. Кеңешме бөлмөсүнөн чыккан судья Мадумаровду 30-октябрга чейин камакта калтыруу чечимин чыгарды.

Конвойлордун коштоосунда соттон чыгып бара жаткан Мадумаров "Жомок, жомок" деп кыска сүйлөөгө жетишти.

Эскерте кетсек, Башкы прокуратура Адахан Мадумаровду 2009-жылы кыргыз-тажик чек арасы боюнча протоколго кол койгону үчүн жоопко тартууга уруксат сураган. Депутаттык комиссия эл өкүлүнө коюлган төрт берененин бири, Кылмыш-жаза кодексинин 338-беренеси (Бийликтен аша чабуу) менен жоопкерчиликке тартууга макулдук берген.

Мадумаров Коопсуздук кеңешинин катчысы болуп 2008-2009-жылы бир жыл иштеген. Ошол маалда Ош - Баткен - Исфана жолун оңдоо жана көпүрө куруу үчүн 275 метр узундуктагы беш гектар жерди тажик тараптан 49 жылдык мөөнөткө ижарага алуу боюнча протоколго кол койгон. Депутат бул документ юридикалык күчкө ээ эмес экенин айтып келет.