Бишкектин "Дордой" базарына жаңы автобус каттамы ачылды

Кечээ, 18-октябрдан тарта "Дордой" базарына №226 автобус каттай баштады. Бул тууралуу бүгүн, 19-октябрда Бишкек мэриясынан билдиришти.

Маалыматка караганда, бул чечим шаардын каттамдык тармагын оптималдаштыруунун натыйжасында жана тургундардын, "Дордой" базарынын жумушчуларынын, базарга келүүчүлөрдүн жана администрациясынын көптөгөн кайрылууларын эске алуу менен кабыл алынды.

"Каттам Асанбай кичи районунан "Дордой" базарына чейин каттап, шаардын түштүк жана түндүк райондорун камтыйт, узундугу 28,4 километр, ал эми автобустардын кыймыл интервалы 7-10 мүнөттү түзөт. Каттамда 18 автобус кызмат көрсөтөт", - деп атылат маалымат.

Белгилей кетсек, бул ар бир жүргүнчү үчүн ыңгайлуулукту жана коопсуздукту камсыз кылуу максатында ишке ашырылды.