Үч жолку Олимпиада чемпиону Анфиса Резцова каза болду

Олимпиаданын үч жолку чемпиону, советтик жана орусиялык биатлончу, лыжачы Анфиса Резцова 58 жашында каза болду. Бул тууралуу Орусиянын биатлон биримдиги билдирди.

Резцова 15-октябрда Москванын жанындагы оорукананын реанимация бөлүмүнө эс-учун жоготкон абалда жеткирилген. 20-октябрда ал башка клиникага жеткирилиши керек болчу, бирок мурдагы спортчу эсине келбей каза болгон. Анын жүрөгү токтоп калган.

2023-жылдын март айында Олимпиада чемпионунун жүрөгү кармаган. Ал Владимир облусундагы үйүндө эсин жоготуп, андан кийин ооруканага жеткирилген. Ошондой эле гемоглобиндин аздыгынан мурунку спортчуга бир нече жолу кан куюлган.

Резцова биринчи олимпиадалык алтынды 1988-жылы лыжа эстафетасында алган. 1990/91 сезондо спортчу биатлонго өткөн. Андан кийин 1992-жылы Альбертвиллде жана 1994-жылы Лиллехаммерде өткөн Олимпиада оюндарында алтын медаль тагынган.