Чек арачылар Өзбекстанга мыйзамсыз 53 баш уй жана буканы алып бараткан адамдарды кармашты

Акыркы эки күндө Ала-Бука чек ара отрядынын чек арачылары Кыргызстандан Өзбекстанга малды мыйзамсыз алып өтүү боюнча бир нече фактыларды аныктады. Бул тууралуу УКМКнын Чек ара кызматынан билдиришти.

Маалыматка караганда, кечээ, 23-октябрда Жалал-Абад облусунун Аксы районунун Ак-Там участкасында 1984-жылы туулган Сөгөт айылынын тургуну И.С. кармалды. Ал 11 баш бодо малды Өзбекстанга мыйзамсыз сатууга аракет кылган.

Ага ылайык, бүгүн, 24-октябрда ушул эле аймакта белгисиз төрт адам 42 баш бодо малды Өзбекстанга алып өтүүгө аракет кылышкан. Алардын бири кармалып, калгандары качып кетишкен. Кармалган 1985-жылы туулган А.Д. аттуу кыргызстандык жаран болгон.

Алдын ала маалыматтар боюнча, кармалган бодо малдын жалпы баасы 2 миллион 300 миң сомду түзгөн.

Тиешелүү документтер толтурулгандан кийин кармалгандар малы менен бирге кошумча иликтөө иштерин жүргүзүү үчүн компетенттүү органдардын кызматкерлерине өткөрүлүп берилди.