Жалал-Абадда эки мектеп кызамыктан улам онлайн окууга өткөрүлдү

Жалал-Абад шаарында кызамык оорусуна байланыштуу эки мектеп онлайн окутууга өткөрүлдү. Бул тууралуу бүгүн, 30-октябрда президенттин Жалал-Абад облусундагы ыйгарым укуктуу өкүлчүлүгүнүн маалымат кызматынан билдиришти.

Маалымдалгандай, мындай чечим шаардык эпидемияга жана эпизоотияга каршы өзгөчө комиссия тарабынан кабыл алынган. Алар: К.Закиров атындагы №2 жана А.Усманов атындагы № 7 орто мектептер.

Ошондой эле ушул эле чечим аркылуу Жалал-Абад шаардык билим берүү бөлүмүнө балдарды массалык эмдөө үчүн №063 форманын негизинде эмдөөдөн баш тарткан, же бир жолку эмдөө алган окуучулардын санын тактап, ар бир мектепте, ар бир бала бакчада эмдөө жасоо жана медициналык кароодон өткөрүү үчүн дарыгерлерге өзүнчө бөлмөлөрдү уюштуруп берүү тапшырылды.

Белгилей кетсек, Республикалык иммунопрофилактика борборунун 28-октябрга карата берген маалыматы боюнча, жыл башынан бери 2316 адамдан кызамык оорусу аныкталган.