Караколдо чуңкурдан жансыз денеси табылган окуучу: Ал телефонуна видео кайрылуу калтырган

30-октябрда Каракол шаарындагы №3 гимназия мектебинин 7-классынын каза болгон окуучусу тууралуу Билим берүү министрлиги үн катты.

Министрликтин маалыматына ылайык, Каракол шаарындагы №3 гимназия мектебинин 7-классынын окуучусу А.А. 30-октябрь күнү сабакка толук катышып, саат 17:50дө сабактан чыгып кеткен жана үйүнө барган эмес. Ал мектепте жакшы окуган окуучулардын катарында болгон.

"Класс жетекчисине окуучунун апасы саат 18:35те билдирген, ошол учурдан тартып класс жетекчиси, ата-энелер, окуучулар, мектеп администрациясы топторго бѳлүнүп, издѳѳ иштерин баштаган. Ошол эле убакта милиция кызматкерлерине кабарлашып, алар дагы издөө ишине катышышкан. Ошол эле күнү саат 22:35те баланын жансыз денеси табылган.

31-октябрь күнү эртең менен баланын телефону табылган, анда анын видео кайрылуусу болгон", - деп билдиришти министрликтен.

Аталган факты Каракол шаардык ички иштер бөлүмүнө катталып, соттук-медициналык экспертиза дайындалган. Учурда тийиштүү иликтөө иштери жүргүзүлүүдө.

30-октябрда саат 12:30 чамасында Каракол шаардык ички иштер бөлүмүнө жергиликтүү тургун кайрылып, 13 жаштагы бала эртең менен мектепке кетип, кийин үйүнө келбей калганын билдирген. Кийинчерээк окуучунун жансыз денеси стадиондун аймагынан табылган.