Пенсия жогорулатылгандан кийин орточо эсеби болжолдуу түрдө айтылды

Соңку маалыматка караганда, Кыргызстанда пенсия жогорулагандан кийин орточо эсеп менен 9 миң 273 сомду түзөт. Бул тууралуу бүгүн, 1-ноябрда Социалдык фонддун өкүлү Жеңишбек Мукамбетов Биринчи радиого берген маегинде билдирди.

Анын айтымында, ушул жылдын октябрь, ноябрь жана декабрь айлары үчүн пенсияны жогорулатууга 3,9 миллиард сом бөлүнгөн. Ага ылайык, төлөмдөргө бөлүнгөн сумма 6 миллиард сомдон 7,3 миллиардга чейин өстү.

"Келерки жылы пенсияга жараша муктаждык 16 миллиард сомго көбөйөт, андыктан бул үчүн каражат Социалдык фонддун бюджетине киргизилген. Айтылган сумма бар жана алар өз убагында төлөнөт. Болжолдуу түрдө 1-октябрга карата Кыргызстанда 764 миң 688 адам пенсия алуучу катары катталган.

Кошумчалап кетсем 3-группадагы майыптыгы бар адамдарга бөлүнгөн пенсиядан тышкары дагы 50 пайыз кошулат. Бул жолу алардын пенсиясына 500 сом эмес, 250 сом кошулду", - деди Мукамбетов.