Бишкекте жаңы санитардык полигон ачылды

Бишкекте жаңы санитардык полигон ачылды. Бул тууралуу бүгүн, 1-ноябрда Бишкек мэриясынан билдиришти.

Мекемеден билдиришкендей, учурда бул долбоордун 4 компоненти ишке ашыруу стадиясында турат:

- катуу таштандыларды чогултуу үчүн контейнерлер үчүн аянтчаларды реконструкциялоо;
- "Тазалык" муниципалдык ишканасы үчүн биллинг системасы, программалык камсыздоону иштеп чыгуу жана ишке киргизүү;
- жаңы санитардык полигонду долбоорлоо жана куруу;
- колдонуудагы тиричилик калдыктары көмүлгөн жайды жабуу жана рекультивациялоо;
- катуу калдыктарды сорттоочу завод жана жашыл таштандыларды компосттоочу тилке.

Ага ылайык, долбоордун жалпы наркы 22 миллион еврону түзөт, анын ичинен 11 миллион евро насыя жана 11 миллион евро грант.

Жаңы шаардык полигон өлкөдө биринчилерден болуп улуттук жана европалык экологиялык стандарттарга ылайык курулат.

"Көлөмү 1,9 миллион метр куб болгон таштанды полигону жакынкы он жылда Бишкекке катуу тиричилик таштандыларын коопсуз таштоого мүмкүндүк берет. Полигонду гидроизоляциялык система менен жабдып, агынды сууну (курч жыты бар булганган суюктук) кармап, тазалоого жана анын жер астындагы сууларга кирип кетүүсүнө жана аны булгап кетүүсүнө жол бербөөгө мүмкүндүк берет", - деп айтылат маалыматта.