Өзбекстандын президенти Палестинага жардам көрсөтүү үчүн 1,5 миллион доллар жөнөтүүнү тапшырды

Өзбекстандын президенти Шавкат Мирзиёев Газа тилкесинин тургундарына гуманитардык жардам көрсөтүү үчүн 1 миллион 500 миң доллар которуу чечимин чыгарды. Каражат БУУнун Жакынкы чыгыштагы агенттигине тапшырылат.

"Биз Палестина элине тилектеш экенибизди билдиребиз жана БУУнун Коопсуздук кеңеши тарабынан мурда кабыл алынган резолюцияларына ылайык өз көз карандысыз мамлекетин түзүү укугун колдойбуз", - деди Мирзиёев.

Ошондой эле ал жакындарынан айрылган палестиналыктарга көңүл айтты.

Белгилей кетсек, Израиль менен Палестинанын ортосундагы согуш 7-октябрдан бери уланууда. Израил ХАМАСтын чабуулунан 1300дөн ашуун адамы өлгөнүн кабарлаган.

Ал эми Израилдин бомбалоосунан шейит болгон палестиналыктардын саны 8 525ке жетти. 21 миңден ашык адам жаракат алып, 2 миңи дайынсыз жоголду.