Айдоочуну өрттөн куткаруу учурунда 2 милиция кызматкери жаракат алып, бири каза болду

Эки милиция кызматкери унаадан чыккан өрттөн айдоочуну куткаруу учурунда күйүк алышып, бири каза болду. Бул тууралуу Баткен облустук милициясынан билдиришти.

Маалымдалгандай, 27-октябрда саат 15:30дар чамасында Бишкек-Ош унаа жолунун 96-чакырымында бензовоз кулап кетип, күйүп баштаган.

Иш сапары менен жолдон өтүп бара жаткан автоунаадагы 30 жаштагы Кызыл-Кыя шаардык ички иштер башкармалыгынын тергөөчүсү, милициянын капитаны Орозмамат Акуналиев менен 41 жаштагы Кызыл-Кыя ШИИБинин кылмыш иликтөө бөлүмүнүн ыкчам кызматкери Дилмурат Шамшиев айдоочуну өрттөн куткаруу үчүн токтоп, жардам берүү учурунда алар дагы өрттөн жабыркап, ооруканага жеткирилген.

Ооруканада милиция кызматкерлеринин бири Шамшиев өрттөн көбүрөөк жабыркап, 1-ноябрь күнү каза болуп калган. Ал эми экинчи кызматкер 30 жаштагы тергөөчү Акуналиевдин абалы оор бойдон ооруканада жатат.