Бишкекте эки күн бою айыл чарба жарманкеси өтөт 

Бишкек шаарында 11-12-ноябрдан тарта дем алыш күндөрү айыл чарба жарманкеси өтүп турат. Маалыматты Айыл чарба министрлигинен билдиришти.

Билдирүүдө айтылгандай, жарманке ар жуманын дем алыш күндөрү өтүп, жыл аягына, тагыраагы 31-декабрга чейин созулат.

"Жарманкенин максаты - ата мекендик өндүрүүчүлөрдүн, агроөнөр жай ишканаларынын жана жеке ишкерлердин айыл чарба продукцияларын сатууга, шаар тургундарына дүң баада жеткирүүдө колдоо көрсөтүү. Жарманкеге катышууну каалаган дыйкан, өндүрүүчү 0555 34 60 60 номерине кайрылып, толук маалымат алса болот" дешти министрликтен.

Жарманке өтүүчү жайлар:

Биринчи Май району (Киев-Раззаков-Токтогул көчөлөрүнүн кесилиши) – саат 8:00дөн 18:00гө чейин;

Октябрь району (Нуркамал Жетикашкаев-Айтиев-Токомбаев көчөлөрүнүн кесилиши) – саат 7:00дөн 19:00гө чейин чейин;

Свердлов району (Төрөкул Айтматов-Токтогул көчөлөрүнүн кесилиши) – саат 8:00дөн 18:00гө чейин.