Эмгек министрлиги таштандыга ыргытылган ымыркайдын жакындарын издеп жатат

Эмгек, социалдык камсыздоо жана миграция министрлиги Бишкекте таштанды челектен табылган балага карата көрүлүп жаткан чаралар тууралуу маалымат берди.

Ведомстводон билдиришкендей, министрликтин кызматкерлери №1 төрөт үйүнө барып, баланын абалын текшеришти.

Ошол эле учурда балага туулгандыгы тууралуу күбөлүгүн алуу, жакын туугандарын таап, камкордукка берүү боюнча иштер жүргүзүлүп жатат.

"Эгерде жакын туугандары табылбай, же камкорчулуктан баш тарткан учурда баланын маалыматтары кийин асырап алуу үчүн ата-энесинин камкордугусуз калган бала катары Мамлекеттик маалымат банкына киргизилет жана социалдык мекемеге жайгаштырылат. Баланы жекече коргоо планы жана маалымат Октябрь административдик районунун балдар иштери боюнча комиссиясында ушул жумада карала тургандыгын билдиребиз", - деп жазылат билдирүүдө.

9-ноябрда Бишкектеги таштанды челектен баштыкка салынган жаңы төрөлгөн ымыркай табылган. Алгач аны пакистандыктар байкап, кийин милиция чакырышкан.

Ымыркай №1 төрөт үйүнө которулган, абалы туруктуу. Ал эми анын энеси 2024-жылдын 11-январына чейин СИЗО-1ге киргизилди.