Баткен шаарында 500 орундуу мектеп курулууда

Баткен шаарынын Базар-Башы кварталындагы Сыдык Айтматов мектеби 500 окуучуга ылайыкташкан. Бул тууралуу бүгүн, 17-ноябрда SUPER.KG порталына президенттин Баткендеги өкүлчүлүгүнүн басма сөз кызматкери Чолпон Бердикулова билдирди.

Маалымдалгандай, типтүү мектеп 133 миллион сомго республикалык бюджеттен каржыланып курулууда.

Мектептин курулушу учурда 40 пайызга бүттү. Билим берүү мекемесин пайдаланууга берүү 2024-жылга пландалган.

Аталган мектептин эски имараты жер титирөөдөн улам жараксыз абалга келген.

Белгилей кетсек, 2023-жыл ичинде Баткен облусунда жалпы 24 мектептин курулушу жана капиталдык оңдоп түзөө иштерин бүткөрүү пландалган.

Бүгүнкү күнгө чейин анын ичинен 7 мектеп пайдаланууга берилди.

Учурда республикалык бюджеттин эсебинен курулуп жаткан дагы 6 мектеп пайдаланууга берүү алдында турат, 7 мектептин курулушу менен 5 мектептин капиталдык оңдоп-түзөө иштерин жыл соңуна чейин бүткөрүү белгиленген.