Бишкекте дагы бир ымыркай ташталды. Аны баштыкка ороп, кутуга салып коюшкан

Бишкек шаарынын Арча-Бешик жаңы конушунда дагы бир жаңы төрөлгөн ымыркай ташталды. Маалыматты Ленин райондук ички иштер бөлүмү таратты.

Милициянын маалыматына ылайык, кечээ, 19-ноябрь күнү саат 22:45 чамасында 102 кызматына Арча-Бешик конушундагы Кара-Кужур көчөсүндөгү турак үйлөрдүн бирине желим баштыкка оролуп, кутуга (коробка) салынган жаңы төрөлгөн ымыркай табылганы тууралуу маалымат түшкөн.

Окуя болгон жерге Ленин райондук ички иштер башкармалыгынын ыкчам-тергөө тобу барган. Милиция кызматкерлери келгенде факты тастыкталган.

Учурда ымыркай ооруканада, анын абалын төрөт үйүнүн кызматкерлери көзөмөлдөп жатышат.

Учурда ымыркайдын апасынын жүргөн жерин аныктоо боюнча тергөө жана ыкчам издөө иш-чаралары жүрүп жатат.

Белгилей кетсек, бул бир айдагы экинчи ымыркай ташталган учур. Буга чейин Бишкекте жаңы төрөлгөн ымыркайдын апасы ымыркайын таштанды челекке ыргытып жиберген.