"Катуу сөгүш". Бишкекте мас абалында унаа башкарган сот аткаруучу боюнча Жогорку Сот үн катты 

Бишкек шаарында мас абалында унаа башкарган сот аткаруучуга тартиптик жаза колдонулуп, катуу сөгүш берилди. Бул тууралуу Жогорку Соттон билдиришти.

"Аталган окуя боюнча Сот департаменти тарабынан кызматтык иликтөө жүргүзүлдү. Сот департаментинин этика боюнча комиссиясынын корутундусунун негизинде Сот аткаруучулар кызмат бөлүмүнүн сот аткаруучусуна карата Кыргыз Республикасынын "Мамлекеттик жарандык жана муниципалдык кызмат жөнүндө" мыйзамына ылайык катуу сөгүш түрүндөгү тартиптик жаза колдонулду. Ал эми мас абалында унаа айдоо фактысы боюнча мыйзам чегинде сот тарабынан аталган сот аткаруучуга карата тиешелүү чаралар көрүлмөкчү", - деп билдиришти Жогорку Соттон.

Кечээ, 19-ноябрда Милициянын кайгуул кызматы мас абалында унаа башкарган сот аткаруучуну кармаганы кабарланган. Ал тааныштарына чалып, кутулуп кетүүнүн айласын издеген.