Акыйкатчы Арча-Бешикте ташталган ымыркай боюнча үн катты

Акыйкатчы Жамиля Жаманбаева “Арча-Бешик” конушундагы үйлөрдүн биринин эшик алдына калтырып кеткен ымыркайдын ишин жеке көзөмөлүнө алды. Бул тууралуу бүгүн, 22-ноябрда Акыйкатчы Институтунан билдиришти.

Маалым болгондой, Акыйкатчы түн ичинде көчөгө ташталган жаңы төрөлгөн наристе тууралуу маалыматты алаары менен аталган институттун тийиштүү кызматкерлерине ымыркайдын укугун коргоону камсыздоону тапшырды. Кызматкерлер бала табылгандан кийин ал дарыланып жаткан төрөт үйүнө барышты.

Анда дарыгер 19-ноябрда түнкү саат 23.05те кабыл алуу бөлүмүнө милиция кызматкерлери абдан катуу үшүп калган жаңы төрөлгөн баланы алып келишкенин айткан.

“Балага бронхопневмония деген диагноз коюлду. Азыр ал дарыгерлердин көзөмөлүндө кайра жандандыруу бөлүмүндө жатат. Дарылоо программасына антибиотиктерди кошушту", – деп кошумчалады дарыгер.

Институттун кызматкерлери төрөт үйүнүн башкы дарыгери менен дайыма байланышта болуп жатышат.