"Ага эмне кереги бар?". Ташиев Көлбаевдин апасы унаанын документтерин бербей жатканын айтты

Бүгүн, 23-ноябрда Жогорку Кеңештин жыйынында депутат Эрулан Кокулов маркум кримтөбөл Камчы Көлбаевдин унаалары эмне болорун УКМК төрагасы Камчыбек Ташиевден сурады.

Ташиев өз сөзүндө Көлбаевдин 60тан ашык унаасы алынганын, алардын кээ бирлеринин документтери жок экенин айтты.

"Камчы Колбаевдин 60тан ашык унаасы алынды. Ошонун 6 унаасынын документтери такталып, Мүлк фондуна өттү, алар сатып жатышат. Калган көптөгөн унааларын үйүнөн, офистеринен, пансионаттардан алып чыгып жатабыз. Кээ бир унааларынын документтери жок. Кээ бир унааларын таштап коюп качып кетишкен.

Көлбаевдин өзүнө эле эмес, мүчөлөрүнө, үй-бүлөсүнө жана башкасына, апасына бир нече унаалар катталган. Апасына 5, 6 брондолгон унаанын эмне кереги бар? Апасы ооруп жатып, документтерин бербей жатат. Калган унаалардын баарын соттун чечими менен алабыз. Бир дагы унаасы көчөдө калбайт.

Үч кызы үч BMW сурады эле берген жокпуз, жөнөкөй унааларда жүргүлө деп. Аялына бир унааны бердик", - деди Ташиев.