Акыйкатчыга уулу ак жеринен адам өлтүрүүгө айыпталып 25 жылга кесилгенин айткан эне кайрылды 

Бүгүн, 24-ноябрда акыйкатчы Жамиля Жаманбаева Ысык-Көл облусунун тургундары менен жолукту. Бул тууралуу Акыйкатчы институтунан билдиришти.

Маалыматка ылайык, жолугушууда жергиликтүү тургундардын көбү милиция, прокуратура, сот кызматкерлери тарабынан алардын укуктары бузулуп жатканын айтып, даттанышты. Мындан улам акыйкатчы мамлекеттик органдардын өкүлдөрүнө алар тарабынан айтылган арыздарды жеринде чечүү талабын койду.

"Каракол шаарынын жашоочусу 25 жылдан бери акыйкаттыкка жете албай жатканын билдирди. Аялдын айтымында, анын участогун үйү менен Каракол шаардык мэриясы “мамлекеттин керектөөсү үчүн” деп алган. Бирок ал мыйзамга ылайык аны турак-жай менен камсыздоо талабы менен көп жылдан бери соттошуп келе жатат. Мындан тышкары акыйкатчыга уулунун укуктарын коргоп берүү өтүнүчү менен улгайган аял да кайрылды. Анын айтымында, милиция кызматкерлери “аялды өлтүрдү” деген күнөөнү мойнуна алдырыш үчүн анын уулун кыйнашып, сот аны 25 жылга эркинен ажыраткан", - деген даттануулар болду деп айтылат маалыматта.

Жаманбаева өз сөзүндө Акыйкатчы институту өзүнүн ыйгарым укуктарына ылайык, Кыргызстандын жарандарынын укуктары менен эркиндиктерин коргоо боюнча бардык чараларды кабыл аларын белгиледи.

Жыйын Каракол шаарындагы Ысык-Көл облустук администрациясынын имаратында өтүп, ага 170 тургун келди. Жолугушууга президенттин Ысык-Көл облусундагы ыйгарым укуктуу өкүлү Эмилбек Абдыкадыров, Ички иштер башкармалыгынын башчысы, облустун прокуратура органдарынын жетекчилери жана башка мамлекеттик органдардын өкүлдөрү катышты.