Баткендин алыскы сегиз айылынын жашоочуларын дарыгерлер акысыз текшеришти 

Баткен облусунун алыскы сегиз айылынын жашоочуларын дарыгерлер акысыз текшеришти. Бул тууралуу бүгүн, 27-ноябрда Саламаттык сактоо министрлигинен билдиришти.

Маалым болгондой, "Үй-бүлөнү пландоо кыргыз альянсы" Саламаттык сактоо министрлиги менен биргеликте Улуу Британиянын Өкмөтүнүн жана БУУнун Кыргызстандагы Калк жайгаштыруу фондунун каржылык колдоосу астында “Баткендик аялдарды жана кыздарды комплекстүү колдоо” долбоорунун алкагында калкка энелик жана репродуктивдик ден соолукту коргоо боюнча медициналык кызматтарга жеткиликтүүлүгүн камсыздоо максатында бир катар комплекстүү иш-чараларды өткөрүүдө.

Ага ылайык, ушул жылдын октябрь айында Саламаттык сактоо министрлиги Баткен облусундагы чек арага жакын жайгашкан 8 айылына мультидисциплинардык мобилдик клиникалардын сапарын уюштурушкан.

"3-октябрдан 21-октябрга чейин онколог-маммолог, гинеколог, терапевт жана УДИ-адистерден турган дарыгерлердин командасы Лейлек жана Баткен райондорунун алыскы айылдарындагы аялдарды жана өспүрүм кыздарды акысыз текшерип жана кеңеш беришти",-деп айтылат маалыматта.