Кореяга өлкөдөн 44 адам мыйзамдуу ишке орношууга жөнөп кетти

Кечээ, 28-ноябрда 44 Кыргыз жараны Түштүк Кореяга жумушка орношуу үчүн жөнөп кетишти. Бул тууралуу Эмгек, социалдык камсыздоо жана миграция министрлигинен билдиришти.

Маалыматка караганда, эки өлкөнүн ыйгарым укуктуу мамлекеттик органдарынын ортосундагы өз ара түшүнүшүү меморандумуна ылайык, 44 адамды мыйзамдуу ишке орноштуруу уюштурулган.

"Бүгүнкү күндө биз Улуу Британия, Италия, Перс булуңундагы өлкөлөр менен келишим түздүк, алар биздин өлкөдөн келген эмгек мигранттары үчүн жагымдуу шарттарды түзүүгө даяр", - деди эмгек министри Гүлнара Баатырова.

Белгиленгендей, 15 жыл аралыгында Эмгек министрлиги Кореянын ишканаларында 5 миңден ашык кыргызстандыкты иш менен камсыз кылды. Учурда 2 миңге жакын Кыргыз жараны Кореяда EPS программасы боюнча иштеп жатышат. Анын басымдуу бөлүгү тамак-аш, кагаз өнөр жай ишканаларында эмгектенет.

Жатакана жана тамактануу (толук же жарым-жартылай) иш берүүчү тарабынан төлөнөрүн эске алганда орточо эмгек акы 2000 долларды түзөт.

"Программанын негизги талабы – корей тилин тийиштүү деңгээлде билүү, 2023-жылдын 10 айынын жыйынтыгы боюнча корей тилин билүү боюнча тестирлөөгө 3 470ден ашуун жаран катышып, 882 адам ийгиликтүү өттү", - деп айтылат билдирүүдө.