Айгүл Жапарова Парижде I эл аралык Cinema Heritag кинофестивалынын ачылышына катышты

Кыргызстандын биринчи айымы Айгүл Жапарова Париж шаарында (Франция) ЮНЕСКОнун колдоосу астында өтүп жаткан Cinema Heritag 1-эл аралык кинофестивалынын ачылыш аземине катышты. Бул туурасында анын социалдык тармактагы баракчасы аркылуу белгилүү болду.

Маалымдалгандай, 28-ноябрда ЮНЕСКОнун штаб-квартирасында өткөн иш-чарага ЮНЕСКОнун башкы директорунун Африка жана тышкы байланыштар боюнча орун басары Энтони Охеменг-Боама, дүйнөлүк кинорежиссёрлор, анын ичинде кытайлык легендарлуу режиссёр Чжан Имоу, түрк кинорежиссеру, Берлин кинофестивалынын жогорку сыйлыгы "Алтын аюунун" ээси Семих Капланоглу жана башкалар да катышты.

Аталган кинофестивалдын финалына кыргызстандык режиссёр Актан Арым Кубаттын “Эсимде” тасмасы өткөнү белгиленет.

Кошумчалай кетсек, бул күндөрү Париждин ири кинотеатрларында кыргызстандык режиссёрлордун – Cinema Heritage программасынын катышуучуларынын тасмалары көрсөтүлүүдө.

Жаңы эл аралык кинофестивалдын негизги максаты – ЮНЕСКОнун идеяларын ээрчип, жаңы реалдуулуктарды жана образдарды ачуу, жаңы таланттардын өнүгүшүнө көмөк көрсөтүү, өзгөчө кино тили аркылуу өлкөлөр, элдер, муундар жана доорлор ортосунда байланыш түзүү.

Cinema Heritage кинофестивалынын негиздөөчүлөрүнүн бири Кыргызстандын Франциядагы толук жана ыйгарым укуктуу элчиси Садык Шер-Нияз.

Фестивалды "Айтыш Франция" ассоциациясы Франциядагы Кыргыз диаспорасынын өкүлдөрүнүн активдүү катышуусунда өткөрүүдө.