Бишкекте туура эмес жерге таштанды таштагандарга айып пул салынат

Бишкектин Свердлов районунда санитардык нормаларды бузгандарды аныктоо, анын ичинде таштандыларды белгиленбеген жерлерге чыгаруу боюнча рейддик иш-чаралар күчөтүлүүдө. Бул тууралуу бүгүн, 5-декабрда Бишкек мэриясынан билдиришти.

Маалым болгондой, Свердлов районунун башчысынын орун басары Рустам Касымбековдун жетекчилиги астында кызматкерлер таң эрте санитардык эрежелерди бузгандарды текшерип, Бишкектин көчөлөрүндө тазалык эрежелерин сактоо боюнча түшүндүрүү иштерин жүргүзүштү.

"Свердлов районунда жеке секторлордо "Тазалык" муниципалдык ишканасы ишке ашырып жаткан таштандыны чыгаруунун (үймө-үй ташып чыгаруу) өз графиги белгиленген. Чарбакер субъекттерге келсек, алар таштандыны чыгаруу боюнча муниципалдык ишкана менен келишим түзүшү керек.

Санитардык эрежелерди бузгандарды аныктоо боюнча рейддик иш-чаралар туруктуу негизде жүргүзүлөт", - деп айтылат маалыматта.

Ошондой эле муниципалдык администрация шаардыктарды жана борбордун конокторун Бишкек шаарын көрктөндүрүү эрежелерин сактоого чакырып, "Укук бузуулар жөнүндө" кодексттин 115-беренесине ылайык, таштандыларды туура эмес жерге таштоо жана өрттөө үчүн эсептик көрсөткүчтүн 55тен 230га чейинки (5500дөн 23000 сомго чейин) өлчөмүндө айып пул каралгандыгын эскертти.