Пакистандан Кыргызстанга Каракорум шоссеси аркылуу алгачкы жүк ташуучу унаа келди

Кечээ, 5-декабрда Пакистан – Кытай – Кыргызстан каттамы боюнча Кыргызстанга Пакистандан алгачкы жүк ташуучу автоунаа келгендигине байланыштуу Транспорт жана коммуникациялар министри Тилек Текебаев жана Пакистандын элчиси Хасан Али Зайгам менен биргеликте салтанаттуу иш чараны ачышты. Бул тууралуу аталган министрликтен билдиришти.

Маалыматка караганда, бул каттамдын жанданышы 1995-жылдын 9-мартында Кыргызстандын, Кытайдын, Казакстандын жана Пакистандын ортосундагы кол коюлган төрт тараптуу транзиттик келишимдин негизинде ишке ашкан.

Ага ылайык, министр Тилек Текебаев Хассан Али Заигамга Кыргызстан менен Пакистандын ортосундагы транспорттук байланышты бекемдөөдө кошкон салымы үчүн ыраазычылын билдирди.

Ал эми Хасан Али Заигам өз сөзүндө, бул каттамды ишке ашырууда ар тараптуу көмөк көрсөткөндүгү үчүн Транспорт жана коммуникациялар министрлигине терең ыраазычылыгын билдирдип, каттамдын ачылышы Кыргызстан менен Пакистан ортосундагы транспорттук кызматташууда өзгөчө күн экенин белгиледи.

Ошондой эле ал Кыргызстандын жүк ташуучуларынын Пакистанга келишин кубаныч менен тосуп аларын жана Карачи, Гвадар портторунун кызматтарын Кыргызстандын жүк ташуучулары колдонуусуна мүмкүн экендигин баса белгиледи.