Камчыбек Ташиев ККМге каршы митингдер боюнча үн катты

УКМК төрагасы Камчыбек Ташиев соодагерлердин ККМге каршы митингге чыгышы боюнча үн катты.

УКМК төрагасы Аламүдүн районундагы жаңы имараттын ачылышында сөз сүйлөп жатып, “Кыргызстандагы базарлардын ээлери ижара акысын эки эсе арзандатышы керек” деди.

"Республика боюнча соода-базар комплекстеринин ээлери — бул иш-аракеттен эбегейсиз зор киреше алып жаткан өлкөнүн эң бай адамдары. Бирок соодагерлер ири суммадагы акча төлөп жатканы менен көпчүлүк базарларда жөнөкөй шарттар жок. Буга байланыштуу соодагерлердин ишин жеңилдетүү үчүн биринчи кезекте базар ээлери ижара акысын кеминде эки эсе арзандатышы керек. Мындан тышкары, кассалык аппараттарды сатып алууда кыйналган чакан ишкерлер бекер кассалык аппараттар менен камсыз болушу керек", - деген Ташиев.

Ошондой эле УКМКнын төрагасы элди "ар кандай чагымдарга алдырбоого" чакырып, чагымчыларга социалдык-экономикалык маселелерди саясий өңүткө өткөрбөөнү эскертти.