Казакстандан Кыргызстанга 72 баш бодо малды мыйзамсыз алып өткөн жаран кармалды

Коңшу мамлекеттен Кыргызстанга мыйзамсыз бодо мал алып келүү фактысы аныкталды. Бул тууралуу УКМК кабарлады.

УКМК тарабынан республиканын аймагындагы аткезчилик ишмердүүлүгүн аныктоо жана бөгөт коюу боюнча көрүлгөн ыкчам иш-чаралардын жүрүшүндө Талас облусунун аймагында коңшу мамлекеттен Кыргызстанга мыйзамсыз ташылып келинген бодо малдар аныкталган.

"6-декабрда Талас районунун чек ара тилкесиндеги Көпүрө-Базар айылынын “Агышай” жергесинде УКМКнын кызматкерлери тарабынан Т.Т.А. аттуу кыргыз жаранынын 72 баш бодо малды (музоо, уй) Казакстандан Кыргызстанга мыйзамсыз алып өтүү аракетине бөгөт коюлду", - деп билдиришти УКМКдан.

Учурда бул материал боюнча кылмыш иши козголуп, мыйзамга ылайык чараларды көрүү боюнча тергөө амалдары башталды.