Ош облустук милициясынын башчысынын жаңы орун басарлары дайындалды

Ички иштер министринин буйругу менен Ош облустук ички иштер башкармалыгынын башчысынын орун басарлары дайындалды. Бул тууралуу бүгүн, 8-декабрда ИИМдин басма сөз кызматы билдирет.

Жаңы орун басарлар:

- милициянын полковниги Ахунов Ашырбек Шамшиевич министрликтин Ички иликтөө кызматынын Ош шаары жана Ош облусу боюнча ички иликтөө бөлүмүнүн башчысы кызматынан бошотулуп, Ош ОИИБинин башчысынын кадр боюнча орун басары кызматына дайындалды.

- милициянын полковниги Увалиев Нургазы Кокунбекович ыкчам иштер боюнча орун басар болду. Ал буга чейин Э.А.Алиев атындагы Академиянын жазык укук кафедрасынын улук окутуучусу кызматында иштеп келген.

- милициянын подполковниги Бекташов Эрнист Бекташович Нарын ОИИБинин Экстремизмге жана мыйзамсыз миграцияга каршы аракеттенүү боюнча кызматынын башчысы кызматынан бошотулуп, Ош ОИИБинин башчысынын коомдук коопсуздук боюнча орун басары кызматына дайындалды.

Белгилей кетсек, Ош облустук ички иштер башкармалыгынын жетекчилиги өз ара келишпестиктен мушташып жататкандагы сүрөт жана видео социалдык тармактарга тараган. Бул окуядан кийин башкармалыктын башчысы Жеңиш Жоробековго “кызматка толук эмес ылайыктыгы жөнүндө” эскертүү тартип жазасы берилип, үч орун басары кызматтан бошотулган.