Мамлекеттик ипотекалык компания аркылуу берилүүчү үйлөрдүн ачкычы үй ээлерине тапшырылды  

Бишкекте мамлекеттик ипотекалык компания аркылуу берилүүчү үйлөрдүн ачкычы үй ээлерине тапшырылды. Бул тууралуу бүгүн, 11-декабрда өкмөттүн басма сөз кызматынан билдирди.

Маалыматка ылайык, 9 кабаттан турган 108-сериядагы турак-жай борбор калаадагы Анкара көчөсүндө жайгашкан. Сапаттуу курулуш материалдарын колдонуу менен тиешелүү талаптарга ылайыкталып салынган үй бардык коммуналдык кызматтарга кошулган. Курулуш ишин “Фаворит Строй Групп” ЖЧК жүргүзгөн. Иш-чарага министрлер кабинетинин төрагасынын орун басары Бакыт Төрөбаев катышты.

“Мамлекеттик ипотекалык компания” ААК менен “Керемет Банк” ААК ортосундагы биргелешкен долбоордун алкагындагы көп кабаттуу үйдүн курулушу аяктады. Бул долбоор Министрлер кабинетинин “Арзан ипотека” багыты боюнча “Менин үйүм 2021-2026” программасынын алкагындагы жүзөгө ашырылды.

Мамлекеттик ипотекалык компанияда кезекте турган жарандар насыяны турак-жай наркынын 20 пайызын төлөө аркылуу, жылдык үстөк пайызы 8 пайыз менен 25 жылга алышты", - деп айтылат билдирүүдө.

Маалыматта канча жаран үйлүү болгону так айтылган эмес.