Ысык-Атанын тургуну айылдашын атып салган. Шектүү кармалды

Ысык-Атада айылдашын тапанча менен бутка аткан шектүү кармалганын бүгүн, 13-декабрда Чүй ОИИБинен билдирди.

Маалыматка ылайык, 12-декабрда саат 00:10 чамасында Ново-Покровка айылынында жайгашкан май алмаштыруучу жайдын жанында айыл тургундарынын ортосунда чыр чыгып, 1973-жылы туулган М.Р. аттуу жаран тапанчасы менен 1993-жылы туулган Д.Т. аттуу жаранды бутка аткан. Ал денесинен оор жаракат алып, аймактык ооруканага жаткырылган.

Бул факты боюнча Кылмыш-жаза кодексинин 267-беренесине (Куралды, ок-дарыларды мыйзамсыз жүгүртүү) ылайык кылмыш иши козголгон.

Окуя болгон жерден 1944-жылы чыгарылган ТТ (Тула Токарев) үлгүсүндөгү тапанча 2 даана гильзасы менен табылып, алар кылмыш ишинде далил буюм катары алынган.

Кылмыш ишине шектүү катары М.Р. аттуу жаран кармалып, убактылуу кармоочу жайга киргизилди.

Учурда тиешелүү экспертизалар дайындалып, тергөө иштери уланууда.