“Орто-Сай” базарын тейлеген салык кызматкери кармалды

Бишкек шаарындагы “Орто-Сай” базарын тейлеген салык кызматынын дагы бир кызматкери кармалды. Бул тууралуу бүгүн, 14-декабрда УКМКдан билдирди.

Маалыматка ылайык, калаадагы Октябрь районунун салык кызматкерлери кызмат абалын кыянаттык менен пайдаланып “Орто-Сай” базарынын соодагерлеринен мыйзамсыз акча өндүрүп жүргөндөрү аныкталды.

Тактап айтканда, аталган район боюнча салык башкармалыгынын кызматкери С.Э.М. жүктөлгөн функционалдык милдеттерине карабастан ыйгарым укуктарынын чегинен чыгып, баюу максатында “Орто-Сай” базарынын соодагерлеринен мыйзамсыз акча алып, ишкерлердин салык төлөөдөн качуусуна шарт түзгөн.

"Салык кызматкерлеринин мындай аракеттери базардагы соодагерлердин нааразычылыгын жаратып, жалпысынан жүргүзүлүп жаткан салык реформасына, анын ичинде контролдук-кассалык машиналарды киргизүүгө терс таасирин тийгизүүдө.

13-декабрда чогултулган материалдардын негизинде салык кызматкери С.Э.М кармалып, убактылуу кармоочу жайга киргизилди", - деп айтылат маалыматта.

Учурда мындай кылмышка тиешеси бар бардык адамдарды жана мамлекетке келтирилген зыянды аныктоого багытталган тергөөлөр уланып жатканы кошумчаланды.