Ошто майыптыгы бар балдар үчүн "Асман" маданий-чыгармачылык борбору ачылды

Оштогу "Мээрим” балдар билим берүү борборунун алдында майыптыгы бар балдар жана жаштар үчүн "Асман" маданий-чыгармачылык борборунун ачылышы болду. Бул тууралуу бүгүн, 14-декабрда Ош шаардык мэриясынан билдиришти.

Маалым болгондой, иш-чаранын алкагында Ош мэриясына өнөктөш уюмдар, демөөрчү мекемелер, майыптыгы бар балдар, жаштар, алардын ата-энелеринин катышуусунда майыптыгы бар жаштардын бир катар маселелерин чечүү боюнча координациялык кеңештин кезектеги жыйыны өттү.

Анда мектепке чейинки, мектептеги жана кесиптик инклюзивдик билим берүүнү өнүктүрүү маселеси каралып, координациялык кеңеш тарабынан аярлуу катмардагы балдарга карата аткарылган иш-аракеттер боюнча маалымат берилди.

Белгилей кетсек, жаңы ачылган маданий-чыгармачылык борборунда билимге муктаж болгон жаштар профессионалдуу адистердин жардамы менен чыгармачылык жөндөмдүүлүгүн арттырышып, өз алдынча жашоо үчүн бизнес чөйрөдөгү көндүмдөргө ээ боло алышат.

"Ошондой эле аталган категориядагы жарандарды социалдаштыруу боюнча окуу-семинарларды өткөрүү, психолог жана юристтен акысыз кеңеш берүү каралган", - деп айтылат маалыматта.