Бишкекте II Элдик курултай өтүп жатат

Бүгүн, 15-декабрда Бишкектеги улуттук филармонияда өлкө башчы Садыр Жапаровдун катышуусунда экинчи Элдик курултай өз ишин баштады.

Курултайга жер-жерлерден шайланган 700 делегат келди. Мындан тышкары, иш-чарага Жогорку Кеңештин депутаттары, министрлер кабинетинин мүчөлөрү жана мамлекеттик органдардын жетекчилери катышууда.

Курултайдын жыйынтыгы менен делегаттар резолюция кабыл алышат. Иш-чара бүгүн, эртең болот.

Бул эки күн бою биринчи элдик курултайда түшкөн сунуштардын кандай аткарылганы жөнүндө бийликтен отчёт берилет. Былтыркы курултайда социалдык көйгөйлөрдөн сырткары, саясий, эл аралык кызматташуулар боюнча дагы сунуштар, каршы пикирлер айтылган.

Эске салсак, биринчи Элдик курултай былтыр 25-26-ноябрь күндөрү өткөн. Анда өлкө аймагынан келген 1000дей делегат катышкан.