Бишкекте баңгизат саткан эки адам кармалды

Бишкекте баңгизат сатууга шектүү эки адам кармалды. ИИМдин басма сөз кызматы алардын бири “Хизбут-Тахрир” экстремисттик уюмунун активдүү мүчөсү экенин билдирди.

Маалыматка ылайык, мурда соттолгон адам маңзат каражаттарын таратуу менен алектенип жатканы тууралуу билдирүү түшкөн. Жүргүзүлгөн тергөө-ыкчам иш-чаралардын жүрүшүндө А.Н. аттуу жаран “улуттар аралык кастыкты козутуу жана эркинен ажыратуу жайларынан качуу” беренеси боюнча мурда соттолгон, Кыргызстандын аймагында тыюу салынган “Хизбут-Тахрир” диний экстремисттик уюмунун активдүү мүчөсү катары ИИМдин каттоосунда туруп, 2013-жылдан бери анын активдүү мүчөсү экендиги аныкталган.

Тактап айтканда, Бишкекте ыкчам-издөө иш-чараларын жүргүзүүдө май куюучу станциялардын биринде Хонда-Фит үлгүсүндөгү унааны башкарган 1987-жылы туулган К.Э. жана жүргүнчү А.Н. токтотулган.

"Жеке текшерип кароодо А.Н.нын чөнтөгүнөн тунук түстөгү целлофан табылып, анда 8 даана өзгөчө жыты бар, кочкул жашыл түстөгү зат болгон. Алынган заттын салмагы таңгагы менен кошо 41 граммды түзгөн. Тинтүү учурунда Хонда-Фит унаасынын айдоочунун отургучунун чөнтөгүнөн салмагы 2 грамм тегеректелген формадагы зат табылып, алынган.

Айдоочу К.Э.нин жашаган жерин тинтүү учурунда кызматтык издөө иттин жардамы менен, салмагы 45 грамм болгон “гашиш” (Афган Чарс) баңги каражаттарын сактоо жайы табылды", - деп айтылат маалыматта.

Аталган факты боюнча Кылмыш-жаза кодексинин 282-беренесинде каралган кылмыштын белгилери боюнча кылмыш иши козголгон.

Экспертизанын корутундусуна ылайык, алынган заттар баңгизат болуп аныкталып, канабисса чайыры “гашиш” болгон. Шектүүлөр тергөө абагына киргизилди.