Tik Tok тиркемеси бөгөттөлгөн жок

Бүгүнкү күндө Tik Tok бөгөттөлгөн жок. Бул тууралуу бүгүн, 19-декабрда Санариптик өнүктүрүү министрлигинин маалымат жыйынында министрликтин байланыш тармагын тескөө жана көзөмөлдөө кызматынын төрагасы Алтынбек Токторбаев билдирди.

Анын айтымында, ушул жылдын 30-августунда тиркемени жабуу боюнча Маданият, маалымат, спорт жана жаштар саясаты министрлигинен кат келген. Себеби, аталган министрликке балдардын психологиясына терс таасирин тийгизип жатат деген кайрылуулар болгон.

Токторбаев Tik Tok тиркемесине техникалык жактан бөгөт коюуга болорун айтып, соттун чеми керек деди.

"Бирок Маданият министрлиги менен тиркеменин өкүлдөрүнүнүн ортосунда сүйлөшүүлөр болгон. Ошондуктан азыр жабылбай эле турат", - деп билдирди.

Эске салсак, 30-августа Маданият, маалымат, спорт жана жаштар саясаты аталган тиркемени жабуу боюнча чечимин Санариптик өнүктүрүү министрлигине жөнөткөн. Бул өз кезегинде коомчулукта талкуу жараткан.