Кыргыз-Азербайжан өнүктүрүү фонду долбоорлорду каржылай баштайт

Экономика жана коммерция министри Данияр Амангелдиев бүгүн, 20-декабрда маалымат жыйынында Кыргыз-Азербайжан өнүктүрүү фонду кийинки жылы өлкөдөгү долбоорлорду каржылай баштаарын билдирди.

Айтымында, 2023-жыл аралыгында долбоорлорду ишке ашыруу жана ишке киргизүүгө багытталган каражат Кыргызстандын Улуттук банкына которулуп жатты.

"Өткөн жылы Орус-Кыргыз өнүктүрүү фонду эле 60 миллион доллар каржыласа, быйыл Финансы министрлигинин кепилдик институттарынын жана ири долбоорлордун аркасында инвестициянын көлөмү 150 миллион доллардан ашты. Мындан тышкары, Кыргыз-Өзбек жана Кыргыз-Венгер өнүктүрүү фонддору активдешип, Бириккен Араб Эмираттары менен да фонд түзүлдү", - деди министр.

Ошондой эле ал өнүктүрүү фонддору аркылуу өлкөгө тартылган инвестициянын көлөмү 50 пайызга өскөнүн кошумчалады.

Эскерте кетсек, Кыргыз-Азербайжан өнүктүрүү фондун түзүү жөнүндө келишимге Азербайжан мамлекетинин президенти Ильхам Алиевдин 2022-жылы күзүндө мамлекеттик иш сапары менен Кыргызстанга келген учурда кол коюлган.

Максаты - Кыргызстан менен Азербайжандын ортосунда экономикалык кызматташтыкка колдоо көрсөтүү болуп саналат. Баштапкы капиталы 25 миллион долларды түзөт. Каржылоо Азербайжан тараптан ишке ашырылат.