Чүйдө мүрзөдөн Камчы Көлбаевдин кылмыштуу тобуна таандык курал-жарактар табылды (видео)

Чүй облусунда маркум Камчы Көлбаевдин уюшкан кылмыштуу тобунун мүчөлөрүнө таандык курал-жарактардын жана жардыргыч заттардын катылган жайы табылды. Бул тууралуу бүгүн, 25-декабрда УКМКдан билдирди.

Маалыматка ылайык, Аламүдүн районундагы Арашан айылындагы көрүстөндөрдүн биринен эки боз полипропилен баштык табылган. Табылган баштыкты текшергенде ар кандай ок атуучу куралдар, ар кандай калибрдеги тапанчалар, Калашников автоматы, кесилген жылмакай куралдар, ок-дарылар жана жардыргыч заттар табылган.

Сотко чейинки өндүрүштүн алкагында жогоруда аталган курал-жарактар алынып, тиешелүү экспертизага жөнөтүлөт.

Учурда аталган курал-жарак кампасына тиешеси бар адамдарды аныктоо, уюшкан кылмыштуу топтун мүчөлөрү тарабынан жасалган бети ачылбаган адам өлтүрүүлөрдө пайдалануу болгондугу боюнча керектүү ыкчам-издөө иштери жүргүзүлүүдө.