Жаңы жылда аймактарга жол кире акысы көтөрүлөбү? ЖКККББ билдирүү жасады

Жаңы жыл майрамы учурунда автобекеттеги такси айдоочуларга жол кире акысын өз алдынча көтөрүүгө жол берилбейт. Бул тууралуу Жол кыймылынын коопсуздугун камсыздоо башкармалыгынан билдиришти.

Билдирүүгө ылайык, ЖКККББ башчысы Азамат Исраиловдун жетектөөсү астында онлайн кеңешме өткөрүлдү.

"Онлайн кеңешмеде Азамат Исраилов жалпы жол унаа кырсыктарынын алдын алуу, жаңы жылдык майрам күндөрү жогорку окуу жайдын студенттери эс алууга чыгышып, айылдарына барып, автобекеттерде алыскы аймактарга каттаган жүргүнчүлөрдүн саны көбөйүп, ал эми аларды ташыган такси айдоочулары ошол учурдан пайдаланып, жол кире акысын өз алдынча көтөрүп алуулары ыктымалдыгын айтып, андай фактыларга жол бербөө жана жаңы жыл майрамы күндөрү жүргүнчүлөрдү ташуу үчүн кошумча коомдук транспортторду даярдоо тапшырмаларын койду", - деп жазылат билдирүүдө.

Мындан сырткары Жаңы жыл майрамына карата жарандардын коопсуздугу үчүн, спирт ичимдигин ичип алып, ар кандай укук бузууларга жол бербөө максатында жер-жерлерде рейддик иш-чараларды уюштуруу тапшырмаларын коюп, бул күндөрү Жол кыймылынын коопсуздугун камсыздоо башкы башкармалыгынын кызматкерлери күчөтүлгөн тартипте кызмат алып барарын белгиледи.