Үстөк пайыз 43 пайызга чейин төмөндөтүлөт. Бишкекте 120 күрөөкана текшерилди

Бишкекте 120 күрөөкана текшерилип, жетекчилерине жылдык пайыз ченди 43 пайызга төмөндөтүү милдети коюлду. Бул тууралуу бүгүн, 28-декабрда УКМКдан билдирди.

Маалыматка ылайык, текшерүүдө лицензиясы жок иштеген 2 күрөөкана, салык мыйзамдарын одоно бузган 2 күрөөкана жана алдамчылык белгилери байкалган 3 күрөөкана аныкталган. Мындан тышкары 200 пайыздан ашкан үстөк менен кыска мөөнөттүү кредиттерди берүү жана күрөөгө коюлган талаптарды бузуу фактылары аныкталган.

Учурда бул фактылар боюнча тергөө амалдары жүрүүдө.

Текшерүүдөн кийин 120 күрөөкананын жетекчилери жылдык пайызды 43 пайызга чейин төмөндөтүүгө милдеттендирилген.

"УКМКнын демилгеси менен 29-декабрда Финансы рыногун жөнгө салуу жана көзөмөлдөө кызматынын сайтында бардык күрөөкана жетекчилеринин чогулушу пландаштырылууда, анда бизнес жүргүзүүнүн жаңы шарттары айтылат", - дейт билдирүүдө.

Буга чейин Чүй облусундагы күрөөкана ээлери 20 пайыздан ашырбоо убадаларын бергени кабарланган.