Абакта жаткан Арстан Алай каза болду 

Диндер аралык кастыкты козутууга багытталган чакырыктарды жасоого айыпталып №31 абакта отурган Арстанбек Абдылдаев (Арстан Алай) каза болду. Бул тууралуу бүгүн, 5-январда анын адвокаты Кайсын Абакиров Фейсбук баракчасы аркылуу билдирди.

Анын айтымында, Арстан Алайды эч кимге кабарлабай эле 31-колонияга которуп коюшкан.

"Анча оор эмес кылмыш жасагандыгы үчүн тергөөчү №1 СИЗОго камоону өтүнсө, иш УКМК тарабынан тергелип жатса да, тергөө судьясы ушундай натыйжаларга алып келди. Октябрь соту тергөөчүнүн көрсөтмөсү менен Кылмыш-процессуалдык кодекстин нормаларын бузуп, бул "контролдук иш" деп акырындап камакка алган.

Ал эми СИЗОнун жетекчилигине анын коопсуздугун камсыз кылуу боюнча бир нече жолу кат жүзүндө кайрылганыма карабай ушундай натыйжа болду.

Бизге кабарлабай эле 31-колонияга которуп коюшканы белгисиз. Бир сөз менен айтканда, укук коргоо органдарынын, тергөөчүлөрдүн, соттордун, ИИБнын мыйзамсыз аракеттери адамдын өлүмүнө алып келди.

Башкы прокуратуранын жетекчилигинен бардык күнөөлүү кызмат адамдарын кылмыш жоопкерчилигине тартууну суранабыз",-деп жазган ал өзүнүн социалдык баракчасына.