Садыр Жапаров православдарды Рождество майрамы менен куттуктады  

Өлкө башчы Садыр Жапаров бүгүн, 7-январда православ динин туткан кыргызстандыктарды Иса пайгамбардын туулган күнү менен куттуктады. Бул тууралуу президенттин маалымат кызматынан билдирди.

"Христианчылык башка конфессиялар менен катар Кыргызстандын социалдык-экономикалык турмушунда маанилүү ролду ойнойт. Эркиндикти сүйгөн элибиздин эң негизги байлыгы – бул биздин биримдигибиз. Ата-бабаларыбыздын салтын урматтоо менен достукту, ынтымакты жана өз ара түшүнүшүүнү көздүн карегиндей сакташыбыз керек. Ар бир кыргыз жараны этноско жана динге карабастан бирдей укуктарга жана милдеттерге ээ. Бир эл катары балдарды чогуу тарбиялап, майрамдарды чогуу өткөрүп, кыйынчылыктарды чогуу жеңебиз. Ал үчүн жарандарыбыздын жыргалчылыгы, өлкөнүн өнүгүшү үчүн биргеликте жемиштүү иштешибиз керек", - деп жазылат президенттин куттуктоосунда.

Мамлекет башчысы Рождествону майрамдап жаткан бардык кыргызстандыктарга ден соолук, бакыт жана бакубатчылык каалады.