Коңшу мамлекеттен Кыргызстанга бодо малды мыйзамсыз алып келген факты аныкталды

Казакстандан Кыргызстанга 50 баш бодо малды мыйзамсыз алып өтүү аракетине бөгөт коюлду. Бул тууралуу бүгүн, 9-январда Улуттук коопсуздук мамлекеттик комитетинен билдиришти.

Маалыматка ылайык, атайын кызмат тарабынан Талас облусунун аймагындагы контрабанданы аныктоо жана бөгөт коюу боюнча ыкчам иш-чаралардын жүрүшүндө коңшу мамлекеттен Кыргызстандын аймагына бодо малды мыйзамсыз алып келүү фактысы аныкталды.

"Ушул жылдын 5-январында Талас районундагы Көпүрө-Базар чек ара айылынын "Чон-Кыя" аймагында УКМК жана Чек ара кызматында иштегендер Т.Р. аттуу Кыргызстандын жаранынын контрабандалык жол менен 50 баш ири мүйүздүү малды Казакстандан Кыргызстанга алып өтүү ишин токтотушту", - деп айтылат билдирүүдө.

Учурда бул факты боюнча жагдайларды жана адамдардын чөйрөсүн аныктоого багытталган тергөөгө чейинки текшерүү иштери башталды. Анын жыйынтыгы боюнча тиешелүү мыйзамдарга ылайык чаралар көрүлөт.