Президенттин катчысы Садыр Жапаровдун атын жамынган шылуундардан сак болууга чакырды

Президенттин басма сөз катчысы Аскат Алагөзов социалдык тармактарда өлкө башчы Садыр Жапаровдун атын жамынып, алдамчылык кылгандар чыгып жатканын бүгүн, 10-январда Фейсбукка жазды.

Алагөзов президенттин атын жамынган шылуундарга алданып калбоого чакырып, "Nolik" деген аккаунттун скриншотун кошо жарыялаган.

"Акыркы убакта президент Садыр Жапаровдун атын жамынып социалдык тармакта ар кыл көз боёмочулук аракеттерге баргандар чыгууда.

Алар аз каражат салып, кыска убакытта көп акча табуу убадаларын берип, буга мамлекет башчысы өзү кепилдик бергендей түр көрсөтүүдө.

Президент Садыр Жапаров соцтармак аркылуу эч кандай сынак же дагы бир пайда табуу иш-аракеттерине эч качан үгүттөбөй тургандыгын билдиребиз жана шылуундардын курмандыгы болуп калбоо үчүн бул сыяктуу жарыяларга ишенбөөгө чакырабыз", - деп жазды президенттин катчысы.