Сеид Атамбаев атасы Алмазбек Атамбаев жакында Кыргызстанга келбей турганын айтты

Жогорку Кеңештин депутаты Сеид Атамбаев атасы Алмазбек Атамбаев жакында Кыргызстанга келбей турганын айтты. Бул тууралуу ал бүгүн, 11-январда Фейсбуктагы баракчасына жазды.

Депутат социалдык тармактарда 28-январда Кыргызстанда митинг өтөрү тууралуу маалыматтар тарап жатканын жана бул маалыматка ишенбөөгө чакырды. Анын айтымында, атасы дагы деле ден соолугу менен күрөшүп келе жатат.

"Официалдуу түрдө айтат элем, атабыз Атамбаев Алмазбек Шаршенович бүгүнкү күнгө чейин ден соолугу менен алышып жатат, жакынкы арада Кыргызстанга келбейт!

Провокацияга алдырбагыла, туугандар! Мындай маалыматтарды биздин ички же сыртта жүргөн душмандар гана таратышы мүмкүн", - деп жазды депутат.

Эске салсак, 14-февралда Алмазбек Атамбаев ага карата козголгон "Батукаев иши" Жогорку Сот тарабынан кыскартылып, эркиндикке чыккан. Сот ошондой эле ага ден соолугуна байланыштуу чет жакка чыгууга уруксат бергени маалым болгон.