Евробиримдик Кыргызстанга 295 миллион сом кайтарымсыз грант берди

Европа Биримдиги Кыргызстанга 295 миллион сом (3 миллион евро) грант берди. Бул тууралуу бүгүн, 11-январда Финансы министрлигинен билдиришти.

Ага ылайык, кайтарымсыз каражат министрлер кабинетинин санариптик трансформацияга байланышкан долбоорун колдоо максатында бөлүнгөн.

"Бул гранттык каражат жогорку технологиялар паркындагы санариптик укуктардын заманбап борборуна көмөк көрсөтүүгө, "Санарип-Аймак" системасын өлкөнүн бардык аймагына жайылтууга ошондой эле калкка электрондук кызматтарды көрсөтүү жана өлкөнүн киберкоопсуздугун жогорулатуу үчүн жумшалат", - деп айтылат маалыматта.

Мындан тышкары гранттык акча санариптик чөйрөдөгү программалык камсыздоону иштеп чыгууга, тармактык министрликтерде маалымат базаларын жүргүзүүгө, өлкөнүн санариптик экономикасын өнүктүрүүгө багытталат.

Электрондук башкарууну ишке ашыруу үчүн Евробиримдик мамлекеттик органдарда окутууларды жүргүзөрү да кошумчаланган.