Пакистандын министри Кыргызстанда алардын студенттери медициналык жактан жетиштүү билим албай жатканын айтты

Пакистандык студенттер Кыргызстандагы медициналык жогорку окуу жайларда тийиштүү деңгээлде билим албай жатат. Бул тууралуу аталган өлкөнүн саламаттык сактоо министри Надим Ян билдирди.

Министр Надим Ян буга алар мекенине келгенде аттестациядан өтө албай жаткандыгы далил экендигин айтты. Ал Пакистанда жүргөн Алымкадыр Бейшеналиевден бул маселени чечүү үчүн кызматташып, биргелешип күч-аракет жумшоону суранды.

Ал эми Кыргызстандын министри өз кезегинде жетиштүү билим бербеген медициналык ЖОЖдордун ишин текшерүүгө, зарыл болгон учурда студенттерди башка окуу жайларга которууга даяр экенин айткан.

Өлкөнүн Саламаттык сактоо министрлигинин маалымат кызматынан кабарлагандай, Исламабадда глобалдык саммит өттү. Анын алкагында эки өлкөнүн тармактык министрлери Алымкадыр Бейшеналиев менен Надим Ян жолукту.