"KG групп" компаниясынын акционерлери бийлик өкүлдөрүнөн жардам сурап кайрылышты

Бүгүн, 16-декабрда өлкө башчысы Садыр Жапаровдун тапшырмасы менен президенттик аппараттын жетекчиси Каныбек Туманбаев “KG групп” компаниясынын акционерлери менен жолугушту.

Жыйынга Бишкек шаарынын мэри Айбек Жунушалиев, Мамлекеттик курулуш агенттигинин жетекчиси Нурдан Орунтаев жана аталган компаниянын өкүлдөрү катышып, үйлөрүн ала албай жаткандардын көйгөйлөрүн угушту. Жолугушууга жалпы 151 адам келди.

Акционерлер бийлик өкүлдөрүнөн ишкер Имамидин Ташовго таандык “KG групп” компаниясынан сатып алган үйлөрдүн курулуш иштерин көзөмөлгө алып, бүтүрүп берүүнү суранышты.

Алардын айтымдарында, көпчүлүк объекттердин акчасы 100 пайыз төлөнгөн.

Бирок үйлөрдүн курулушу токтоп, алар кеминде 5 жылдан бери ала албай жүрүшөт. Буга компания коронавирус пандемиясын себеп кылып келет.