Бишкекте мектеп окуучуларынын райондук олимпиадасы башталды

Бишкекте мектеп окуучуларынын райондук олимпиадасы эки күн бою кыргыз тили жана адабияты, орус тили жана адабияты, алгебра, тарых, география, англис тили, физика, химия, биология сабактары боюнча өткөрүлөт. Бул тууралуу бүгүн, 18-январда Бишкек мэриясынан билдиришти.

Маалым болгондой, Ленин районунда олимпиада №40 мектебинде өтүп, ага муниципалдык жана жеке менчик мектептерден 700дөн ашык бала, Октябрь району боюнча олимпиада №62 орто мектебинде өтүп, ага 521 бала катышууда. Ал эми Свердлов районунда олимпиада №65 мектебинде өтүп, ага 729 бала, Биринчи Май району боюнча олимпиада №6 мектепте өтүп, 474 бала катышып жатат.

Белгилей кетсек, райондук этаптын жеңүүчүлөрү олимпиаданын шаардык этабына катышат. Негизги милдеттер окуучулардын окуп жаткан предметтерге болгон кызыгуусун арттыруу, жогорку класстын окуучуларына кесип тандоодо жардам берүү, илимий чыгармачылыкка өзгөчө жөндөмдүү жана кызыккан окуучулардын чыгармачылык демилгелерин аныктоо жана өнүктүрүү болуп саналат.