Сокулуктагы кыргыз-өзбек биргелешкен автоунаа заводу качан ишке кирери айтылды

Сокулук районунда жайгашкан кыргыз-өзбек биргелешкен автоунаа чыгаруучу заводдун курулушу 2024-жылдын биринчи жарымында аяктайт. Бул тууралуу бүгүн, 22-январда экономика жана коммерция министри Данияр Амангелдиев маалымат жыйында билдирди.

Анын айтымында, завод биринчи жарым жылдыктын жыйынтыгы боюнча алгачкы продукцияны чыгара алат.

“Жол картасы бар, ага ылайык заводду ишке киргизүү ушул жылдын башына пландалган. Бирок аба ырайына байланыштуу долбоор жарым жылга жылдырылды. Ушул жылдын ортосуна чейин заводду ишке киргизебиз деп ойлойм. Биринчи жарым жылдыктын жыйынтыгы боюнча биринчи продукцияны чыгарууга аракет кылабыз. Бул жөнөкөй долбоор эмес. Аны туура жөндөп, керектүү технологияларды, роботтоштурулган шаймандарды орнотуу бар", - деди Амангелдиев.

Эске салсак, Кыргызстандын аймагына биргелешип автомобиль чыгарган заводду куруу тууралуу макулдашууга Өзбекстандын президенти Шавкат Мирзиёевдин былтыр 26-27-январда Бишкекке болгон мамлекеттик сапарынын алкагында кол коюлган.