Аламүдүн капчыгайында жоголгон жаранды издөөгө бүгүн 282 адам чыкты

Бүгүн, 23-январда таң эрте Аламүдүн капчыгайында дайынсыз жоголгон 28 жаштагы жаранды издөө иши кайрадан улантылды.

Өзгөчө кырдаалдар министрлигинен билдиришкендей, учурда 282 адам чыкса, анын 172си министрликтин куткаруучусу. Анын ичинде 1 кинолог, 4 атчан бар. "Алар 6 дрон, 18 техника менен капчыгайда издөө ишине чыгышты. Ал эми ИИМден 110 адам 1 дрон, 4 техника менен чыгышты. Жалпы 22 техника, 7 дрон тартылды", - деп жазылат анда.

Белгилей кетсек, 14-январь күнү Аламүдүн капчыгайында (Тёплые ключи) 1996-жылы туулган М.М.уулу дайынсыз жоголгон. Министр Бообек Ажикеев дайынсыз жоголгон жаранды издөө ишинин жүрүшүнөн жеринен кабар алып, куткаруучулардын санын көбөйтүү тапшырмасын койгон. 20-январда издөө иштери убактылуу токтотулган.